Power Rangers, ისინი ვინც რამდენიმე თაობას ახსოვს თავისი ბავშვობის საყვარელ სუპერგმირებად. მახსოვს როდესაც ბაღში ჩემს ბაღელებთან ერთად განვიხილავდით თუ რომელი ძალის რეინჯერი იყო ყველაზე ძლიერი და რა თქმა უნდა უმეტესობას მოსწონდა წითელი რეინჯერი რომელიც ფაქტიურად გუნდის ლიდერად ითვლებოდა, მაგრამ მახსოვს ის დროც როდესაც დამცინოდნენ იმიტომ რომ წითელი გოგოს ფერი ეგონათ და მე თამაშის დროს სულ წითელი რეინჯერი ვიყავი ხოლმე. ძალიან ბევრი სეზონია გამოსული ამ სატელევიზიო სერიალის და რა თქმა უნდა მე ბევრი მათგანი არ მაქვს ნანახი მაგრამ ჩემს ნანახთა შორის საუკეთესოდ ვთვლი Mystic Force Power Rangers რომელიც დარწმუნებული ვარ ბევრს გემახსოვრებათ არხიდან Jetix რომლის დახურვამაც ძალიან ბევრს გაუტეხა გული, მართალია არხი არ დახურულა და უბრალოდ Disney-ს არხად გადაკეთდა მაგრამ ის მულტისერიალები თუ სერიალები აღარასდროს დაბრუნებულა.
კარგით, თავი გავანებოთ ძველ რეინჯერებს და მივუბრუნდეთ ახლებს და მინდა ვთქვა რომ ეს ერთ-ერთ იმ ფილმთაგანია რომლების გამოსვლასაც მე ძალიან ველოდები და ჯერ-ჯერობით Mighty Morphin Power Rangers-ის რემეიკის გამოსვლის თარიღი ცნობილია როგორც 2017 წლის 24 მარტი მაგრამ ეს ინფორმაცია ალბათ მალე განახლდება, ან შესაძლოა ეს მართლაც ფილმის პრემიერის ზუსტი თარიღია. მიუხედავად იმისა რომ 1990 წელს გადაღებული ორიგინალის შემდეგ კიდევ ბევრი ფილმი გადაიღეს, ეს მაინც განსაკუთრებული იქნება და არამგონია იმდენად ბავშვური იყოს როგორც ადრე. ჯანდაბა, ახლა დავფიქრდი და უახლოეს წლებში ძალიან ბევრი ძველი ფილმის რემეიკი გველოდება და მათ შორის შეიძლება ამას შანსებიც არ ჰქონდეს რადგან ხალხს ახსოვს როგორც მცირეწლოვანი აუდიტორიისთვის განკუთვნილი სერიალი. ვერ დაგპირდებით რომ ფილმი იქნება R-Rated როგორც წინა წლის ფანების გადაღებული ფილმი მაგრამ განკუთვნილი იქნება მოზარდებისთვის და ასე ვთქვათ გატარდება როგორც The Hunger Games ან The Divergent. და კიდევ ერთხელ მინდა გავიმეორო რომ მაგარი ეფექტები და უფრო მაგარი ბრძოლის სცენები გველოდება.
რეჟისორის სახელი შესაძლოა ყურში ნაცნობად არ მოგხვდეთ მაგრამ რეჟისორი ფილმის ყველაზე მნიშვნელოვანი ნაწილია და ამ ფილმის რეჟისორი არის Dean Israelite, შეიძლება იცით ფილმი Project Almanac რომელიც არც თუ ისე წარმატებული აღმოჩნდა მაგრამ ერთ-ერთი იმ ფილმთაგანია სადაც კარგად არის აღწერილი თუ რა შეიძლება მოჰყვეს დროში ჩარევას. Project Almanac-ზე ბევრს არაფერს გეტყვით და დაგიტოვებთ საყურებლად თუ ჯერ არ გინახიათ მაგრამ ინტერესის ასამაღლებლად უნდა გითხრათ რომ მიუხედავად შთამბეჭდავი მეცნიერული ფანტასტიკისა ფილმი სავსეა მოზარდული ხუმრობებით და ასევე მაღალკლასელების პირადი ცხოვრებით რაც ჩემი აზრით კიდევ ერთ ინტერესის ობიექტს ამატებს ფილმს. მოკლედ ამ რეჟისორს არც თუ ისე ბევრი ფილმი აქვს გადაღებული მაგრამ ჩემი აზრით უკვე საკმარისი გამოცდილება აქვს ასეთი მასშტაბური პროექტის წასაყვანად. როგორც ვიცი მთლიანი გადამღები ჯგუფი გამოცდილია და მათ უმუშავიათ როგორც კლასიკური ფილმების რემეიკებზე ასევე სუპერგმირულ ფილმებზე და ამიტომ ვფიქრობ რომ ამ მხრივ ჩვენს რეინჯერებს არანაირი საფრთხე არ ემუქრებათ. ახლა რაც შეეხება მსახიობებს რომლებიც ასრულებენ Ranger-ების როლებს და რაც მთავარია ვინ რაფერი რეინჯერის როლს ასრულებს: Naomi Scott - ვარდისფერი რეინჯერი ; Becky G. - ყვითელი რეინჯერი ; RJ Cyler - ცისფერი რეინჯერი ; Ludi Lin - შავი რეინჯერი ; Dacre Montgomery - წითელი რეინჯერი. არ დაგავიწყდეთ რომ რეინჯერებს ძალები მისცა Zordon-მა და ასევე სწორედ მან ასწავლა რეინჯერებს ყველაფერი და მის როლს ასრულებს Breaking Bad-ის მთავარი პერსონაჟის როლის შემსრულებელი Bryan Cranston. ჯერ არ არის ცნობილი თუ როგორი იქნება ახალი ზორდონი მაგრამ წინა ზორდონის მიხედვით თუ ვიმსჯელებთ მაშინ გიგანტური ჰაერში მოტივტივე თავი უნდა იყოს საზარელი ხმით. და ასევე კიდევ ერთი შესანიშნავი მსახიობი Elizabeth Banks რომელიც შეასრულებს ფილმის მთავარი ბოროტმოქმედის Rita Repulsa-ს როლს და ვისაც 1990 წლის გადაღება გაქვთ ნანახი მაშინ მაშინვე შეამჩნევთ რომ ელიზაბეტის რიტა რეპულსა ძალიან განსხვავდება ორიგინალისგან.
და ის რითიც იყო შთაგონებული ეს პოსტი - The Zords, ერთ-ერთი მნიშვნელოვანი რამ მთელი Power Rangers-ის ისტორიაში. ალბათ ბევრს გახსოვთ მაგრამ თუ არ გახსოვთ შეგახსენებთ რომ მიუხედავად ბევრი შესაძლებლობისა ხანდახან რეინჯერები ვერ ახერხებენ მათზე ძლიერი ან მათზე დიდი მტრის დამარცხებას და ამისთვის მათ ჰქონდათ გიგანტური ზომის რკინის ცხოველები, მანქანები, ან უბრალოდ რობოტები რომლის საშუალებითაც ხშირად იგებდნენ ბრძოლას და ასევე მათ აქვთ შესაძლებლობა გააერთიანონ თავიანთი ზორდები და მიიღონ Megazord რომელსაც ყველანი ერთად მართავენ, მართალია ზორდების ბრძოლის დროს მთელი ქალაქი ინგრეოდა მაგრამ არაუშავრს, მთავარია ჯანმრთელობა. ქვემოთ მოცემულ სურათებში თქვენ ნახავთ რეინჯერებს თავიანთ ზორდებთან ერთად, მაგრამ ზორდები კარგად არ ჩანან სამწუხაროდ და არამგონია კიდევ უფრო კარგად გამოჩნდნენ ფილმის თრეილერამდე, რომელიც უკვე წესით მალე გამოვა რადგან ფილმის პრემიერამდე ბევრი აღარ დარჩა.
